"Disco Inferno", die musical, is 'n storie van keuses, liefde en vriendskap wat getoets word met die morele dilemma van beroemdheid versus die alledaagse.  "Disco Inferno" word opgevoer deur Hoërskool Florida in die Promusica Teater in Roodepoort vanaf 25-28 Mei 2011. Kliek hier om die pdf lêer oop te maak.

LEN AMBROSIUS IN SAMEWERKING MET KOOS JANSEN VAN VUUREN EN LOJALE FLORRIE OUERS EN ONDERSTEUNERS BEWERKSTELLIG ‘N FLORRIE-WONDER…’n permanente Buitelugverhoog!

Die tyd van wonderwerke is nog nie verby nie!  Len Ambrosius van Caffé Molinare – ook van Florries se eie Onthaalbedryf & die Kafeteria – was die stukrag agter die waarword van ‘n droom: Florries se eie opelugverhoog!  Koos Jansen van Vuuren (adjunkhoof) was die skool se verteenwoordiger op die projekbestuurspan en die volgende ouers en donateurs het deur groot finansiële bydraes alles moontlik gemaak:

Bertie van QSP Construction
Ian Coetzee van Waste Giant
Harry Dunn van Dunmar Security
Marius
Leon Mans van Apcon Risk Mamagement &
Len Ambrosius self.
Boet Neethling van AMBO Marketing het ook waardevolle insette gelewer uit sy ervaring in die bedryf van dekor, musiek en beligting!

Dit is ‘n unieke konstruksie en dit voldoen aan die vereistes van professionele kunstenaars.  As sodanig hoef daar nie meer telkens tydelike verhoë teen groot kostes opgerig te word nie en kan daar groot besparings teweeggebring word wanneer sulke kunstenaars geakkommodeer word.  Dit is uniek in die opsig dat dit van twee kante af benut kan word: vanaf die noordekant vir kleiner gehore en vanaf die A-rugbyveld se kant vir groot gehore.  Hesta van Straten met haar Drama-brein kon ook nie uitgepraat raak oor die 360 grade teatermoontlikhede vir haar dramastudente nie.  Sy kon haar oë nie glo oor wat Len-hulle in die bestek van 10 dae kon bewerkstellig nie.

Die dag toe daar ‘n Monument (met erkenning aan Suparugby vir die woordspeling) vir ons trotse Eerste Rugbyspan (én die onder 15’s) gebou is teen Monument op die rugbyveld het daar heel gepas ‘n Monument agter die noordelike mikke vir kultuur verrys!  Op dieselfde dag is hierdie unieke verhoog op luisterryke wyse ingewy met optredes deur ons eie Idols van 2009 asook die Idol-finaliste wat sake gaan uitspook op 30 Julie om te bepaal wie die 2010 Action Idol gaan wees. 

In die koelerige aandlug is die honderde toeskouers egter getrakteer op ‘n skouspel wat hierdie kultuurmonument waardig is.  Die hoogtepunt was die onwaarskynlike duet van Gert van Tonder van Groep 2-faam (byt net vas: Oom Gert was lid van die bekende Groep 2 van julle ma’s, pa’s en ja seker ook oupas en oumas se tyd, maar hy het darem ook Wielie Walie op TV aangebied vir vandag se jong onderwyseresse en onderwysers!) en Snotkop (almal wat sy optrede daardie aand beleef het, weet nou dat sy verhoognaam sy beskeidenheid weerspieël – ‘n mooi oopgesig jong man wat selfs ouer mense glad nie ongemaklik laat voel oor sy taalgebruik en stories nie en wat buitendien sê “Oom Gert (van Tonder) is die coolste oom!” – hoe kan enigiemand nog twyfel oor hierdie Afrikanerseun wat die Jeug moet kom lei!?) met die bekende Groep 2-liedjie: Die padda wou gaan opsit!  Natuurlik stik die toeskouers van meer gevorderde ouderdom en natuurlik gepaardgaande lewenswysheid eers in Len se drinking chocolat voordat hulle besef hulle is in die minderheid wat die rap-weergawe van hierdie onskuldige vryliedjie  en verwysing na Escom as volksvreemd beleef en begin hulle maar saam skouers skud!  Toeskouers was beïndruk met wat Boet Neethling met die verhoog van steen en sinkplaat vermag het: dekor wat gepas sou wees by die staatsteater en klank- en beligting wat skrik vir niks!

En daar staan hy: ‘n triomf vir Florries wat nog opslae gaan maak ten opsigte van buitelugaanbiedings!  Baie geluk aan almal wat by hierdie projek betrokke was en baie dankie aan die donateurs – ‘n gedenkplaat sal volgens Len (iemand sal net moet sorg dat hy nie sy naam uitlaat nie) reg laat geskied aan julle onmisbare bydrae.  Volgens Len gaan die verhoog ook aan ander skole en instansies beskikbaar gestel word teen bekostigbare tariewe.  Navrae: Len Ambrosius 082-714-6676.