|
Koorleiers
2010
HOëRSKOOL
FLORIDA KOOR TREE OP SAAM MET KLOPJAG
Op Vrydag 8 Mei 2009 span die Con Spirito-koor van Hoërskool Florida kragte saam met een van
Suid-Afrika se suksesvolste rockgroepe, Klopjag, om een van die opwindendste
produksies op vanjaar se konsertkalender op die planke te sit. Hierdie
unieke geleentheid word aangebied in die ouditorium van die Universiteit
van Johannesburg en beloof om vir die konsertganger ‘n ervaring te wees wat nie
gou vergeet sal word nie.
Klopjag is welbekend vir hul diversiteit en dinamiese
aanslag en is bekend vir liedjies soos “24 uur”, “Stof” en “Nie langer”. Hul mees onlangse album, “Musiek vir die
agtergrond”, is benoem vir die Beste alternatiewe Afrikaanse album tydens
vanjaar se MTN SAMA toekennings en Klopjag word reeds geruime tyd as een van
Suid-Afrika en Afrikaanse musiek se top-groepe beskou sover dit lewendige
optredes aangaan.
Al die Klopjag liedjies wat in die produksie ingesluit
is, is herverwerk om die koor in te sluit en andersom en dit is volgens Klopjag
een van die lekkerste en uitdagendste produksies wat hul nog aangepak het.
Die Con Spirito-koor bestaan al reeds vanaf 1976 en is
een van Suid-Afrika se top-jeugkore.
Hulle het reeds verskeie toere gedurende die afgelope ses jaar in die
buiteland gedoen waar hulle baie goed ontvang is en baie lof verdien het. Hierdie toere sluit in optredes in ‘n paar
Europese lande sowel as ‘n toer in Suid-Amerika. Die koor was die wenners van die Nasionale Terisano Eisteddfod in 2006 en was
tweede in 2008.
Die koor tree op onder leiding van Ralf Schmitt wat homself oor die laaste dekade as een van
Suid-Afrika se top-jeugkoor-dirigente gevestig het. Hy is sedert 2005 betrokke by die koor en die
koor se uitstaande resultate gedurende die laaste vier jaar onder sy leiding,
is sonder twyfel ‘n getuigskrif vir sy kennis en talent in hierdie genre. Volgens Schmitt is dit vir hom en die lede
van die koor ‘n voorreg om saam met Klopjag te werk en sien hulle die optrede
saam met Klopjag, as een van die hoogtepunte van hul kalender vanjaar.
Aande soos hierdie is min en ver uitmekaar. Maak dus
seker dat, indien jy in die Gauteng-omgewing is op 8 Mei, jy nie uitmis op ‘n
unieke musiek-ervaring soos hierdie nie.
Kaartjies vir hierdie besondere geleentheid is beskikbaar by die
Hoërskool Florida se algemene kantoor en die skool kan geskakel word by 011 672 5345 vir meer inligting.
Wenners van
Skole-eisteddfod 2006
|
